ETS, Euskal Herriko musika talde entzunenetarikoa da eta euskal musikaren gaur egungo fenomeno garrantzitsuenetako bat. Beraien melodia itsaskorrek geroz eta publiko zabalago batera heltzea lortu dute.

Iekoran (Arabako Errioxa) 2005. urtean sortu zen, gaur egun taldean jarraitzen duten hiru lagunen eskutik, Iñigo, Floren eta Campi. Hirukotea, punk-rock abestiak bertsionatzen hasi ziren, Kaotiko, La Polla Récords, Kortatu, Piperrak, Boikot edo Reincidentes bezalako taldeen eraginpean. Hilabete gutxien ostean, taldea abesti propioak konposatzen hasi zen.

2006 eta 2007 urteren artean Arabar Errioxan kontzertuak ematen hasi ziren, Bujo tronpeta-jolea ezagutu arte. Geroztik, ETSk etorkizunean jorratuko zuen estilo berri bat hasi zen jotzen: ska-rock-a. Hurrengo urtean, 2008an, taldeak berak Vendimia Seleccionada ekoiztu zuen , sei abestiz osatutako maketa-diskoa.

2009. urtean Lucas sartu zen taldean, tronboia esku artean zuelarik, taldeak gaur egun mantentzen duen egitura finkatuz: gitarra, bateria, baxua, tronboia eta tronpeta. Arrazoi profesionalengatik, 2011an Bujok taldea utzi behar izan zuen eta bere lekua Rubén Terreros tronpetajoleak hartu zuen. Aipatu beharra dago, 2009 eta 2010. urteetan zehar Luko saxofoi-jolea taldean egon zela, baina Bujoren antzera, arrazoi pertsonalak zirela medio, taldea utzi behar izan zuen.

2012an euren lehen disko profesionala grabatu zuten, Hacia La Luna, eta Baga-Biga diskoetxearekin lanean hasi ziren, Euskal Herri osoan zehar euren kantuak entzuten ziren bitartean. Bestalde, taldea Arabako Errioxatik kanpo kontzertu ugari jotzen hasi zen, zuzeneko indartsu eta alaia eskainiz. Jarraitzaileak gutxinaka hazten joan ziren, oro har publiko gaztea.

Bi urte geroago, 2014. urtean, Zure Mundua izeneko bigarren lana grabatu zuten. Taldeak ospea hartu eta jarraitzaile kopurua nabarmen igo zuen.

Hurrengo urtean, 2015ean, taldeak Beldurrik ez hirugarren diskoa ekoiztu zuen. Motzagoa, euskara hutsean eta rockeroagoa. Durangoko Azokan aurkeztu eta lehenengo 10 salduenen artean sartu zen.

Bi urteko biraren ondoren, 2017an, ETSk bere laugarren lana kaleratu zuen, Ametsetan, bi ataletan banatzen dena. Alde batetik, Gasteizko jaietan 10.000 lagunen aurrean grabatutako zuzeneko disko bat eta DVDa. Bestetik, taldearen bizitza azaltzen duen 55 minutuko dokumentala. Lan honekin, ETSk bere 12 urteko historiaren errepasoa egiten du, bere ibilbidean norabide aldaketa bat iragarriz, erronka musikal berrietan murgildu ahal izateko.

2019ko amaieran, taldeak Aukera Berriak izeneko bostgarren lana aurkeztu zuen, bi urte lehenago azaldutako aldaketa gauzatuz. Pello Reparaz-ek ekoiztuta, aurreko lanekiko jauzi kualitatiboa erakusten duen lehen diskoa da, seriotasuna, exijentzia eta heldutasuna erakutsiz, hori bai, taldearen funtsa eta freskotasuna galdu gabe. Durangoko Azokan diskorik salduena izan zen.

2020ko areto-biran sarrera guztiak saldu ondoren, taldeak agenda osoa bertan behera utzi behar izan zuen Covid-a dela eta. Hala ere, Zurekin Batera ereserkia konposatu zuten pandemiaren erdian, euskal gizartea hunkituz. Urtebete geroago, antzokietako biran sarrera guztiak agortu zituzten ikuskizun intimo eta hunkigarria eskainiz, garai hartan bizi izan zen ezohiko egoerara egokituz.

2022an, plaza guztiak berriro bete ondoren, ETSk bere lanik ausartena plazaratu zuen, Guretzat, Genis Trani-ren ekoizpenarekin. Diskoa apostu mimatua da, non pop-a nagusi den eta edozein aurreiritzi musikal alde batera uzten duen. Diskoak pertsonak, kalea eta herri kultura omendu nahi ditu eta eguneroko bizitzaren isla izan nahi du. Emozioen mendi errusiarra eta aldarteen trantsizioari buruzko adierazpen artistikoa da (samurtasuna, alaitasuna, nostalgia, euforia).

Gaur egun taldea bere azken diskoa aurkezten ari da eta Euskal Herriako musikan eragin handienetariko duen taldea bilakatu da. Gainera, zuzeneko indartsu eta kementsua dute, eta publikoaren zati handi bat dantzaraztea, irribarre egitea eta hunkitzea lortzen dute.